रामेछाप । विगत दुई दशक देखि खडेरीको चपेटामा परेको दक्षिणी रामेछापमा जनप्रतिनिधिहरुले पानी संकलनका लागि नागरिकहरुलाई खानेपानीको ट्याङ्की वितरण गर्ने कार्यलाई अभियानको रुपमा संचालन गरेका छन् ।

रामेछाप नगरपालिका वडा नम्बर ६ ओख्रेनीमा पछिल्लो पटक मंगलबार नागरिकलाई ट्यांङ्की वितरण गरीएको छ । नगर प्रमुख लबश्री न्यौपानेले ओख्रेनीका १ सय ६० परिवारलाई ५ सय लिटर क्षमताका प्याष्टिक ट्याङ्की वितरण गरेका छन् । ओख्रेनीमा गत बर्ष वडा कार्यालयले ३ सय ४० परिवारलाई ट्याङ्की वितरण गरेको थियो । वडा अध्यक्ष राजेश तामाङका अनुसार अझै ओख्रेनीका ४ सय ४५ परिवारलाई ट्याङ्की वितरण गर्ने कार्यक्रम रहेको छ ।

सुख्खा क्षेत्रमा रहेका नागरिकहरुले बर्षायाममा परेको आकाशे पानी संकलन, करेशावारी सिंचाई र पानीको संकलनका लागि स्थानीय सरकारले दिएको निशूल्क ट्याङ्की प्रयोग गर्दै आएका छन् । रामेछाप नगरपालिकाका प्रवक्ता तथा वडा नम्बर ७ का वडा अध्यक्ष समिर कार्कीले रामेछाप नगरपालिकामा ट्याङ्की वितरणको अभियान थालेका थिए । कार्कीका अनुसार सुकाजोरका कुल ९ सय २७ परिवार मध्ये बसाई हिडेका र वसोवास छोडेका बाहेक ८ सय ५५ परिवारलाई निशूल्क खानेपानी ट्याङ्की वितरण गरिसकिएको छ । वडा नम्बर ४ हिमगंगा र वडा नम्बर ८ रामेछापमा समेत उक्त अभियान संचालन हुदै आएको छ ।

वडा कार्यालयले खानेपानीको ट्ङ्याकी उपलव्ध गराएपछि खानेपानीको सास्ती वेहोर्दै आएका नागरिकहरुले पालो वसेर घरमा ओसारेको पानी संकलन गर्न सहज भएको र ठुला चाडपर्वमा पानीको उपयोगमा सघाएको सुकाजोरका रामवहादुर कार्कीले वताएका छन् । कार्कीका अनुसार स्थानीय सरकारले गरेको उक्त सहयोगले गाउँमा रहेका असक्तले समेत छिमेकीको सहयोगमा पानी संकलन गरेर केहि दिन सम्म उपयोग गर्न सहज भएको छ ।

वडा कार्यालयहरुले नगरपालिकाको बार्षिक कार्यक्रम अन्तरगत नागरिकहरुलाई उक्त ट्याङ्की वितरण गर्दै आएका छन् ।